janakiarm

|కపిల రాంకుమార్‌|| మెడపై కత్తి ||
ఇక్కడ
ఏదో ఒకచోట
ప్రతీ రోజు
ధిక్కారస్వరపు నాలుకను కత్తిరిస్తారు
నిఘానేత్రాల చిత్రాలు
నలుదిదెసలా ప్రసరించకుండా
తెరలకు నల్లరంగేస్తారు
విచక్షణ కోల్పోయే లక్షణం
నరనరాన జీర్ణించుకున్నారు కాబట్టే
మానవత్వాన్ని మట్టిలో పాతిపెట్టేస్తారు
సమాజశ్రేయోవాదులను చీకటి కారాగారాల్లో బంధిస్తారు
బయటి ప్రపంచంతో బంధాలు తెంపేస్తారు
లేదా
తీవ్రవాదముద్రేసి రాజ్యహింసకు పాల్పడతారు.
మృతకళేబరమైన పిదప
హత్యను ఆత్మహత్యగా చిత్రీకరిస్తారు
ఏ పరీక్షకు అవకాశమివ్వకుండా
నిజాలు పాతిపెట్టే సంస్కారమున్నవాళ్ళు కాబట్టి
ఆనవాలు, ఆచూకి ఐనవాళ్ళకు దొరక్కుండా కాల్చేస్తారు
బూడిద పట్టికెళ్ళి వాసన చూడమంటారు!
నరమాంసం మెక్కే మెకాల్లా
కాషాయవర్ణపు నాలుకను పతాకంలా రెపరెపలాడిస్తారు
ఇప్పటికి కాకపుట్టని బద్ధకస్తుల్లారా
రోజూ పొడిచే పొద్దు పొడుపుతో ఎరుపెక్కండి!
నాశనమౌతున్న ప్రజాస్వామ్యాన్ని కాపాడేందుకు తిరగబడండి
సింధూరపు బందూకులై తలెత్తుకునేలా మొలవండి!
ఈ నేలా గర్వపడేలా అరుణకేతనమై ఎగరండి!