మెనీ మినీలు

కపిల రాంకుమార్|| మెనీ మినీలు ||
1.అశ్లీల దృశ్యాల జడివాన
తడిపిముద్దచేసి
లొట్టలేయిస్తుంది కాని
జబ్బువాత పడుతామని
జాగరూకత మరుస్తున్నారు!
2. మురికినీటి పరవళ్ళకి
ముక్కు పగులుతున్నా కాని
మూసీవొడ్డునే సరసాలు
మానలేకున్నారు.
కంపులోనే యింపుగా కాపురాలు
చేస్తారుగాని దోమకాలకు రోగాల పాలౌతున్నారు!
3.రాజకీయ పండితుల
సంస్కార రహిత సంస్కృతోచ్చారణ
కర్ణభేరి పగిలినా కాని
యెదురుదాడులు చేస్తారు కాని
బ్రౌన్‌ దొరకు  కూడ దొరకని
కొత్త నిఘంటువులకు బాంది వాచకమౌతారు!
4.అందాల పోటీలు కనువిందు చేస్తుంటే
అడ్డుకునే వారుంటారు
ఆడ్డకోలుగా ఆర్థికంగా బలిసే వారుంటారు
కబళించిన గ్లోబలి మాయాదండంలో
ఆడేవరిదా తప్పు! ఆడ ఆదువారిదాతప్పు!
ఆడించే వారిదా తప్పు!
కష్టాల కడలి దాటే యత్నాన
కష్టపడితేకాని మరి కొంత నష్టపడితేకాని
కాసులూ రాలవు – రోజులూ గడవవు!
స్వాభిమానులు మనుషులుగా మిగులుతారు
లొంగిపోయినవారు మానాలు ఫణంపెడతారు!
5. ఆకు కూరలు పప్పు ధాన్యాలు మాని
ఫాస్ట్ ఫుడ్ సెంటరులో పిజ్జాలు తిని
ఊబకాయాలతో బీపీలు షుగర్లు హెచ్చి
డాక్టర్ల జేబులునింపి గొల్లుమనే బికార్లవుతారు!
6. శాస్త్రీయ విద్యలు మృగ్యమౌతున్నాయికాన్వెంటు చదువురొంపిలో దిగి
ఉభయ  భ్రష్టత్వమై ఉన్నవాడికి తప్ప,
లేనోడికి కొలువురాక నిరుద్యోగ గ్రహాలు పెరిగె
7.పౌరాణిక యితిహాసపు పునాది లేని సాహిత్యం
మనజాలదు కలకాలంకాలక్షేపం కాదు కవిత్వం
వాక్యం, కావ్యం, పద్యం, వ్యాసం
గేయం, కవిత, రూపకంయేదైనా  సృజన మీదే ఆధారం
లేకపోతే నేల విడిచిన సామై
లక్ష్యం లేని గమ్యమై
సాధనలేని రాగమౌతుంది!
8. ఎన్నికల పండగొస్తే
యెన్నికలలు పండుతాయో
ఓటుకింత రేటు
నోటికింత సాపాటు
గొంతులోకి సారాయి
గిట్టుబాటైతే చాలు
చిన్ని నాపొట్టకి శ్రీరామ రక్ష
దేశమేమైతే నాకేమి
నేను చల్లగుంటే చాలు
అదే నాకు పదివేలు!
9: ముక్తాయింపు:
కవి ‘ లో ‘
కవిత్వం ‘ హై ‘
కపిత్వం ‘ సై ‘
ఎవరికి యేం కావాలి?
నాకు మాత్రం కవితత్వమే కావాలి!
నికార్సయిన కవిత్వంతో పాటు.!
27.5.2013  6.23 pm