janakiarm

కపిల రాంకుమార్|| బీరయ కోడుకో!

బీరయ కొడుకో
నువు దడవకు బిడ్డా
దయిర్నమె నీకు రచ్చన బిడ్డా
గొర్రెలమ్మి, పెంటనమ్మి - పాలనమ్మి బొచ్చినమ్మి
సంసార మీదకుంటె - బూర్లెముకుడు బోర్ల పడు!
మొండికుంట సెరువుకింద - రెండెకరాల చెక్క మీద
రెక్కలేమొ ముక్కలాయె - పదిమందికి దిక్కాయె
**
దొరగారి బిడ్డడు - గడ్డివాము చాటుగ
అక్కలచ్చి మానము - బుగ్గిచేసినాడని
రక్తమేమొ ఉడికినాద - కర్రతీసి వురికినావు
బుర్రనేలవంచి నీవు - గొర్రెనప్పగించినానని
టపటప చప్పుడుతో - ఆకసాన గద్దలెగిరె
భుగభుగ మంటలతో - అడవితల్లి కోపగించె
గట్టుమీద మైఅసమ్మ - కల్లెర్ర చెశాది
కడుపు మండి కమలమ్మ - ఉరితాడు మింగాది
కాల్లేమొ వనకబట్టె - కల్లలోన నూల్లాయె
అయ్యకేమి చెప్పాలో - పాలుపోక రోదించకు
**
విందులోన తందనాల దొరతనము చిందులేయ
దాకలోన కూరతోటి గొర్రె మనసు పాడుతుండె
పెంచినోడి గుండెలోన పంచనామ చేస్తాంటే
చీకటేల సూరీడు గడ్డివాము మంటాయె
లచ్చితోటి పిచ్చికొడుకు - చిచ్చులోన  గొగ్గులాయె
పుచ్చెలేమొ పగిలాయి - పుచ్చయెన్నలొచ్చాది!
అర్దరాతిరేల యెలుగొచ్చి - పల్లె కీడు తొలిగింది
మంటలేమొ సెగల్లై - పంటసేలు కాసింది
అడివి దుమ్ము రాకుండ అడ్డు కట్ట తానయింది
కష్టాలు కాలువలు యికముందు పారవులె
కాష్టాల మంటల్లో దొరతనము బూదాయె
బక్క జనమికమీదట ఒక్క తాటి నడవాలి
పెత్తనాలు యెదిరింప విద్దెలింక నేర్వాలె!

17.4.2013 సాయంత్రం 3.10