| తుఫాను కోసం ||

కపిల రాంకుమార్|| తుఫాను కోసం ||
మన కళ్ళముందు
అన్యాయం జరుగుతున్నా
నోరు మెదపలేని
స్వరం పెంచలేని
బలహీనులం!
దానికీ కారణాలు లేకపోలేదు
అదుగో
అలా నోరెత్తినవాడ్డి మొత్తుతున్న
రాజ్యషింస తాలూకు సవ్వడి
మనలో భయాన్ని పెంచి,
ధైర్యాన్ని చంపేస్తోంది!
తెగించిన వాడికి తెడ్డె లింగమన్నారని
చావుని సైతం కౌగిలించుకుని
చిరునవ్వు రువ్వకలిగే
స్థిర చిత్తం వుంటే తప్ప
వాటిని నిలువరించలేమా?
మనకెందుకులే అనే మౌనమే
దురాగతాల కొనసాగించడానికి ఊతమిస్తున్నాయి!
ఆందుకే ఒంటరి పోరుతో కాదు
సమూహ ఘర్జనగా మారాలి!
ఉద్యమం ఉప్పెనలా పోటెత్తాలి!
ప్రజాగ్రహం ముందు
కొద్ది సేపు మొండిగా మొరాయించినా
వివిధ నిర్బంధాలు ప్రయోగించినా
నిరశన ప్రదర్శనలపై తరువాతైనా
సర్కారు మెత్తపడక తప్పదు
భవిష్యత్తు లెక్కలు తేడారాకూడదుగా
అధిష్ఠానం మొట్టికాయలు వేయకుండా
గోచీ సర్దుకోవాలి - కాకుంటే పలచబడరూ?
బతికుంటే బలుసాకు తినొచ్చని,
సీటు పోతే పరువు గోవిందా అని మాత్రమే
తగ్గుతారు పెద్ద యోచనాపరులు
జనాలకు భయపడి కాదు!
వారి జనానాలకు దడిసి!
ఖజానాలకు బొక్కపెట్టడంలో
యోజనాలు సైతం ఔపోసన పట్టే
ఘోటక రాజకీయ ఋత్వికులుకదా!
పదవులు, పందేరాలు,
వాటాలు లాబీలు సక్కగుండాలి!
అల్లుడి కోసమో, బుల్లిల్లు కోసమో
అధికారమోజేతి నీళ్ళు అమృతంలా తాగి
చొంగా కార్చుకుంటా లొట్టలేసుకున్న నాయాళ్ళు
ఇప్పుడు మెడమీదకొచ్చేసరికి
వృద్ధ జంబూకంలా నీతులు చెబుతూ
అయ్యగారి రహస్య చిట్టాలు
గోసాయి మంత్రాలు
చర్చాగోష్టుల్లో పాల్గొన్న వివరాలు
పుత్ర రత్నాల హారాలు
ఉంపుడుకత్తెల దింపుడు పళ్ళాలు
ముత్యాల పేరుల్లా అందిస్తారు అప్రూవరులై!
గొంగట్లొ తిన్న సామే
గొంతుకడ్డం పడి,యెంట్రుకొచ్చిందని
చెప్పినంత తేలికగా వదిలించుకోగలరా యీ కర్రు (మరక)
చట్టానికి లోబడి కాదు, చుట్టంగా లోబర్చుకొని
చేసేన  దందాలు, చందాల రూపంలో
అనర్హులసైతం అందలమెక్కీస్తే
అరదండాల సన్మానం తప్పదు కదా
స్వార్థం - అవినీతి జోడు గుర్రాల స్వారి
తత్కాలిక విజయ కేతనాలెగరేసినా
నికార్సైన  దుర్భిణి ముందు
గర్భ నిర్థారణ దుర్బేధ్యమైనదేమీ కాదు!
అవాంచిత శిశోదయాన్ని
విచ్చిన్నం చేయక తప్పదు!
నూరు గొడ్ల తిన్న రాబందు
తుఫానుగాలికి కూలినట్లు
ప్రజాగ్రహం వెల్లువై
అనివార్యంగా ప్రకృతి ప్రకోపానికి మించిన
శూన్యమేర్పడి శరవేగపు మేఘపు
ఝంఝా మారుతం ప్రజాతుఫానై రావాలి 
వేచి చూడడం కాదు సృష్టిద్దాం! -
19.4.2013 సాయంత్రం 3.45