పచ్చనీ హారాలు ( కపిల కైతలు)

కపిల రాం కుమార్// పచ్చనీ హారాలు ( కపిల కైతలు)

1.పట్టుదల లేక
ఓటమి
తల పట్టుకుంది

2. పెట్టుబడి లేక
ఇంటి కట్టుబడి
ఆగింది.

3. కట్టుబాటు తప్పి
బతుకు బాట
తప్పింది

4. గురి తప్పి
లక్ష్యం
పరువుదీసింది

5. గిట్టుబాటు లేక
సేద్యం
కాలి బూడిదైంది.

6. ఎంపికలో
నిర్లక్ష్యం
ఐదేళ్ళ శాపమైంది

7. గతించిన
బాల్యం
గోడపటమైంది

8. ఐక్యతలేక
ఉద్యమం
అమ్ముడుబోయింది

9.సఖ్యతలేక
జంట
చీలిపోయింది

10. చిగురించే ప్రేమ
ద్వేషానికి
బలైంది

11. నిజం చెప్పని
అహం
కారాగారమైంది

12. కూట సాక్ష్యం
జైలునుండి
విడుదల

13. ఆయువు ఆగి
క్షణంలో
మట్టైంది

కాని.....

14. పచ్చనీ బతుకున
పచ్చడీ మెతకకు
పచ్చలా హారం

అందుకే

15. ఉదయించే 
రాగమే
విప్లవ గీతమైంది!

16-10-2012 ఉదయం 4.56

ఎదురుచూపు

కపిల రాం కుమార్ //ఎదురుచూపు//

మసిబారిన మనుగడలో - ఎన్నాళ్ళీ మౌనాలు?
తలయెత్తుకు తిరిగేలా కలిగిస్తా ధైర్యాలు!

సాంఘిక ధర్మపు జాఢ్యాలు - డబ్బూ జాతీ హోదాలు
సామాన్యుని రక్తం పీల్చే అధునాత్నాతన రోగాలు!
కులము మతము వంకలతో కుళ్ళిపోయెను మానవసంఘం
నాకేమని ఊరుకుంటే ఊరంతా మారణ హోమం!

రక్తాలను తాగే మత్తులో అనురాగం చిత్తై పోయెను
సంస్కారం చంకలు నాకి దహనాలకు ఆజ్యం పోసెను!
బాధితులు ఊరట పొంద, పోరాడగ ముందుకు కదులు
వేదనలే తొలిగేలా వెలిగించు దీపాలు!

నా పాటే సూర్యుని కిరణం వెలుగు బాట నీకు శరణం
చైత్తన్యపుటక్షర వెలుగు నీ అండగ నిలిచెను చూడు!
ఒక వ్యాసుని జననం కోసం నవ శిల్పుల రాకడ కోసం
అను నిత్యం ఈ  యత్నం  కొనసాగును కడ వరకు!

7-10-2012

(నా కవితా సంపుటి నగారా నుండి - 2004)

చెకుముకి/

కపిల రాం కుమార్// చెకుముకి//

రాయి రాయి రాపిడిలో నిప్పు పుట్టినా
వెదురు పొదల గాలి చేరి పాట పుట్టినా

అవసరాలు తీరుటలో సాధనాలు ముఖ్యం
సాధనాల పుట్టుకయే విజ్ఞానపు గమ్యం!

నీటిలోని చేప - నేల మీద జీవి
చెట్టుపైన కోతి - కోతి నుండి మనిషి
రాతి యుగం లోహయుగం - మానవ పరిణామ క్రమం
పరికరాల సంపాదన - విజ్ఞానపు ప్రగతి పథం!

గాలి ధూళి - ఎండ వాన - ప్రకృతిలో సహజం
జీవరాశి వయసు తెలుప శిలాజాల నైజం!
అనుమానపు భ్రమలు తీర్చు - వివరించును విజ్ఞానం
అనుసరించ లేకపోతే మింగివేయునజ్ఞానం!

మోసగాళ్ళ చేతిలో కీలుబొమ్మ దైవం
వ్యాపారపు సరళిలో ప్రజలనుండి దూరం!
నోట మంట మింగటం నిప్పులపై నడవటం
మహిమలేమి కావులే కృషివుంటే సాధ్యములే!

కాటిలోని కొరివి చూసి కలవరాలు వీడు
బొమికలోని భాస్వరం గాలి చేత మండు!
భూభ్రమణపు క్రీనీడలు సూర్య చంద్ర గ్రహణాలు
మినుకు మినుకు తారలన్ని నింగిలోని తోరణాలు

నేల మీద చెట్లుంటే - నింగి నుండి నీరు
లేకుంటె కాలుష్యం - జీవనమే కన్నీళ్ళు!
సాధనాల వినియోగం సమాజాన కళ్యాణం
గాడి తప్పి పయనిస్తే - జీవకోటి వినాశం!

తేనెపూత కత్తులేమొ కుత్తుకలను తెంపును
నిజమెపుడు చేదు మాత్ర - రోగాలను తుంపును!
చీకటిలో పయనించకు - నిను నీవే నిందించకు
మేలుకొలుపు పాటలతో విజ్ఞుడిగా మసలుకో!

4-10-2012

రన్నింగ్ కామెంటరీ కాదు బర్నింగ్ కాంటెంపరరీ చూడు!

కపిల రాం కుమార్ //రన్నింగ్ కామెంటరీ కాదు బర్నింగ్ కాంటెంపరరీ చూడు!//

బంద్ కు పిలుపిస్తే పనీ పాట లేదంటారు
సమ్మె కట్టితే నిమ్మకు నీరెత్తుతారు
బలగాలను దింపి శలభాలను చేస్తారు!

టిక్కట్టు పెరిగితే యిక్కట్లు పడుతూ
తిట్టుకుంటూ ఎక్కుతారు ప్రయాణం మానరు!
ధరాఘాతానికి మాడతారే కాని సూటిగా ప్రశ్నించరు!

అధికారం పోతుందని భయంతో గుండెమీద చేయ్యేసి చెప్పరు
ఇంట్లో వ్యతిరేకిస్తున్నా నిజం మాత్రం ఒప్పుకోరు!

దిమ్మ తిరిగే బుద్ధి చెప్పి గద్దె దించే సత్తవున్నా
ఓటుతో వేటు వేస్తారా? అదీ అనుమానమే!
వేయలేని వారు కొందరు! పేరులేని వారు మరెందరో్!

చట్టం చట్ట్రంలో యిరుక్కుంది - రాజకీయం కుర్చీకే బందీయయ్యింది
ఉద్యమాల సవాల్ ఉధృతమైనా చాప మిందికి నీరు వస్తేకాని కదలరు!

మూకుమ్మడి కవాతు చేయించే తాహతు
కలిగినోడు లేడు - కలవడానికి రారు!
గమ్యం ఒకటే దారులు వేరు
అజెండా అంటూనే జెండాలు వదలరు!

చెట్టు పేర కాయలు - కుక్క మూతి పిందెలు
గొర్రె దాటు నేతలు బురదలోని పందులు
కాగ్ యిచ్చిన షాకులకు , కోర్టులిచ్చిన వాతలకు
కోవర్టులౌతారే కాని కరెక్ట్ చేసుకోరు!

శీలాలి చిద్రమైనా - చదువులు చంక నాకినా
వ్యవసాయం ఎత్తు పడినా మౌనవ్రతం వీడరు!
ఆదుకొమ్మని రోదిస్తే పగ పడతారు
వద్దు పొమ్మని అడ్డగిస్తే పొగ పెడతారు!

గలించే నెపాన గాలిలో కలిపి
కాల్చిన బూది చేతిలో పెడతారు!

అదును రావాలే కాని పదునైన కరవాలంలా
ఎవరో ఒకరు వేయరా అడుగు!
ఏదో ఒక రోజు మారదా బతుకు!..అని
ఎదురు చూడటం మాని తిరుగుబాటు జెండ ఎత్తుతారు!
వ్యవస్థ కొమ్ములు తుంచుతారు!
జాతికి ఉప్శమనం కలిగించుతారు!
దానికి మనమే పూనుకోవాలి!
జనానికి ఊతమవ్వాలి!

30-09-2012

తిరగ రాసే శక్తివమ్మా

కపిల రాం కుమార్// తిరగ రాసే శక్తివమ్మా!//

అమ్మదనపు కమ్మదనం - విషతుల్యం చేస్తున్నారు
కాలుష్యపు తుపానులో సతమతమవుతున్నది.
పనిచేసే ప్రతిచోట కసిచూపులు మామూలే
ప్రతివాడి వాడి పలకరింత మసిపూసిన కోరికలే
ఎవరమ్మ తలచేది పదేపదే ' అమ్మా ' అని
గాయమైన వేళ వినా - ఆకలైతే తప్ప ఆతృతపడేది!

అవనిలో సగమన్నది పచ్చి నిజం!
మగడు సగమన్నది - సగమే నిజం!
సమానమైన సగాల్లో సమాజాన విలువేది?
ఆటబొమ్మలాగ ఆడుకోచూస్తారు!
ఆదుకోమంతేను అదోలా చూస్తారు!

ఎందుకమ్మా ప్రేమను - అంతయిదిగ పంచుతావు
విలువలు (వలువలు) తుంచుతున్నా
మమతలు పెంచుతూనే పశువులనాదరించుతావు?

తల్లిగా ముద్దులిచ్చి - గోరుముద్దలందించి
తల్లడిల్లునీకు చివరికేమి దక్కు?
పనిపాటల అలసినా ఆలంబన లేదు నీకు
కనిపెంచిన (కన్న తరువాత పెంచక చస్తుందా)
బిడ్డలకూ లోకువేనా?

మగనితోటి - అత్తతోటి-ఆడపదుచు మనసుతోటి
అల్లుకొను, సర్దుకొని సంసారమీదుతావు!
నుదుట రాసిన గీతంటూ, మనువు పెట్టిన షరతులన్నీ
తలచుకుంటే తిరగరాసే శక్తివమ్మా
తరతరాల పొగరు దింపు!

26-09-2012

ఏడవకు ఏడవకు వెర్రి నా తల్లి

కపిల రాం కుమార్//ఏడవకు ఏడవకు వెర్రి నా తల్లి//

ఏడవకు ఏడవకు వెర్రి నా తల్లి
ఏడిస్తే నీ కళ్ళు నీలాలు కారు !
ఈ నాఅటి లోకాం మోసాలు ఎన్నో
తెలవకుండ నీవు కాలిడకు తల్లి !

ఎర్రాని ఎండల్లో చెమటోడ్చు నీ తల్లి
వచ్చేను యిచ్చేను మురిపాల లాలి !
ఆందాక ఉయ్యాల నీకు తోడమ్మ
ఊగేటి కొమ్మల్ల గాలి నీదమ్మ !

పొట్టకూటికి మట్టి తవ్వే
పలుగు పారలె నేస్తగాళ్ళు !
గుడిసె బతుకున మట్టిపరుపులు
గుట్టుచెప్పీ గుజ్జన గూళ్ళు !

ఇంటిలోనివారు యినుమువంటివారు
కార్ఖాన గుట్టల్లొ కరిగిపోతున్నారు !
రేపటి నీ బతుకు వెన్నెలా కాయాల
మాపిటేలా దాక సద్దుచేయకనుండు !

గుక్కపెట్టి నీవు రోదించకమ్మ
అమ్మ నీకిపుడు పాలివ్వకున్నాది !
కమ్మటి ముద్దిచ్చి కదిలిపోనుంది
ఎండిన రొమ్మున పిండినారావు !

గంజి కరువైన కడుపున పుట్టావు ! పాలు రాని రొమ్ములో
రక్తమైనా మిగలనీ ! కన్నీళ్ళు దాచేసి బోసి నవ్వులు రువ్వు!

25-09-2012

చిటికలోనే కరుగునోయ్!

కపిల రాం కుమార్// చిటికలోనే కరుగునోయ్!

గుడిసెమీది కోడి కూసె - ముసుగు తీసిలెగవేమీ?
కూలిదొరక కట్ట మైతే -కడుపునిందు దారుయేది?

ఎండ చచుర్రుమన్నకూడ సీమకుట్టినట్టులేదు
బండాళ్ళుకొట్టికొట్టి కండబలమూ తగ్గినాద?
చిన్న చితక పనులు చేసి చిన్నగానే కూడబెడితే
చిన్నపోరికి మనువు చేయ చింతలింక దూరమగును!

సారకొట్టుకెల్లనీకి సంబరంగ పోయినట్లు
కూలికెళ్ళి కడుపు నింప జాగులేక నిదురలే
రెక్కలాడిన డొక్క నిండు, రొక్కమెవడు ఉద్దరీడు
బిక్కమొగమిడిసినీవు సక్కగాను కదులుమిపుడు!

చేయి కలిపి పనికిపోతేనే చేవ కలుగు నిజమోయి
చేదుమాత్ర లెన్నైనా చిటికలోనె కరుగునోయి
ఆడుతు పాడుతు పనిచేస్తేనే నాలుగు యేళ్ళులోనికెళ్ళు
నేటి రోజున మనుగడ ప్రియము కానున్నాది చూడవే?

24.9.2012

/పలుగుతో పాటు ఎలుగెత్తు/

కపిల రాం కుమార్//పలుగుతో పాటు ఎలుగెత్తు//

ఊడల మర్రికి ఊయల కట్టి ఉఫుతున్న ఊర్మిళా
జోల పటపాడే ఊర్మిళా నిదురోయేటి బిడ్డనుచూసి
మురిసిపోతోందమ్మ ఊర్మిళా ఆద్మరచివుండకంటూ
ఆన యిచ్చెనమ్మ ఊర్మిళా..పనికు పైనమాయె ఊర్మిళా!

కాయకట్టపు బతుకిలోన కాయా పండా తేడాలుండవు
కాలంచెల్లిన గతుకులు వినా గాయం మానే రోజులుకావు!
కటిక చీకటి రాతిరేల నుదుటి కుంకుమ చెరిగిపోయె
బరమ పేలి బతుకునావ బెరుకులేక లాగవమ్మా!

మగడులేని బతుకు బారం మేయునపుడు దిగులుపడకు
కట్టకాలపు మోత బరువు తలచుకుంటూ కలత వలదు!
కొమ్మకు వూగే అన్నంమూట కాకులు ఎత్తూకెళ్ళవులే
కాకులు కావు పలుకాకుల లోకపు పాపపుకళ్ళకు తూలకులే

ఒక్కరోజే ఓదార్పు - ప్రతిరోజూ నిట్టూర్పు
వేన వేల కట్టాలు పనులముందు దిగతుడుపు
కుక్కలు చించిన విస్తరికాకు - రెక్కలు తెగిన పక్షివి కాకు
రాతిని తవ్వే పలుగును యెత్తి నారీ హక్కులకు యెలుగెత్తు!

23-09-2012

నగారా

కపిల రాంకుమార్// నగారా//

నిదురించే యువతా మ్రోగింది నగారా !
కదం త్రిక్కి కదలందే మనుగడె లేదంట!
ముక్కాలు పెట్టుబడి ప్రజలనుండి రాబట్టి
వ్యాపారపు నరసింహాలు తప్పుదారి పదుతుంటే !

విదేశీ హస్త లాఘవం స్వదేశీ హస్త ఖండనం
సన్నకారు కృఇంగిపోవ చప్పపడిపోతుంటే !
నోట్ల ఓట్లు ఆశపెట్టి పార్లమెంతు మెట్లు యెక్కి
రేవుదాటి తెప్పముంచి తప్పుకోను చూస్తుంటే !

పంటలేమొ పండుతున్న పంటికేమొ అందవాయె
దళరీల మాయలోన రైతు ''కూలి'' (కి) పోయె !
గింగరాలు తిప్పగాను దొంగ దెబ్బతీయగాను
ఎఫ్.డి.ఐ. వృషభంలా రంకె డొంకదారినొస్తుంటే !

జన్మ నిచ్చు జనని నేడు జనారణ్య శిబిరంలో
రాబందుల ఆకలికి ప్రతిరోజు నలుగుతుంటే !
విద్య్ల లేని శ్రమ జీవులు సంక్షేమం పేరుమీద
వధ్యశిలకి నైవేద్యమవుతుంటే !

చర్ఖాలకు బురఖాలు గొయ్యి తవ్వుతుంటే
చేతుల పని తెగ్గొట్టి యంత్రాలు వస్తుంటే !
నినాదాల హోరులోన విధానాలు మారుతుంటే
ఉద్యమాల లక్ష్యాలు గోడదాటి పోతుంటే !

మోసగాళ్ళు, వేషగాళ్ళు, భక్తిపేర పచ్చిమూతు
ఆధ్యాత్మిక ముసుగులో అక్రమాలు చేస్తుంటే !
ఈ రాజ్యపు టధికారం ప్రజకెలా రక్షణిస్తుందో
మత వాదపు గాడ్సేలు ఊచకోత కోస్తుంటే !

స్వతంత్రాన్ని చంపేసి పరతంత్రం పెంచేసి
కుతంత్రాల్ కులతంత్రపు మంత్రదండమొస్తుంటే !
ఎవరికొరకు ఈ రాజ్యం! ఎవరి సర్లు ఈ భోజ్యం !
సొంతకాళ్ళ నిలిచేలా జనులందరు కదిలేలా !!

కళ్ళుతెరచి ఉద్యమించు స్వతంత్ర్యాన్ని రక్షింప
ప్రజలకొరకు పథకాలు ప్రజల పరమయ్యేలా !
పరాధీన కౌగిలి కబందుడ్ని మించిపోయె !
త్రిప్పి కొట్టు తుప్పు వదల - కర్ర కన్న బుర్ర మిన్న !!

22-09-2012>>>.....

పచ్చి నిజం

కపిల రాంకుమార్ // పచ్చి నిజం//

చక్కెర మిల్లు సైరనుకూసె - సైకిలెక్కు మామయ్యో!
డొక్కలునింప రెక్కలకట్టం తప్పాదింక మామయ్యో!

ఇంటికి వచ్చే దారిలోన కోతి చేష్టలు చెయ్య కుండ
యిద్దరి ఇజ్జతు నిలిచేలా దిక్కులు సూడక యింటికే రా!
వచ్చీపోయె దారీలోనా మాయదారి లారీలుంటాయ్
సైకిలెక్కి సోకులు పోతే గోతుల పడతావ్ మామయ్యో!

కొంపకు నీవు చేరే దాక పానం నీ మీదుంటదిరా
పసుపు తాడుగట్టికోసం రోజూ నిన్నే మొక్కుతవూంటా!
సారాకొట్టు, బ్రాంది షాపు కళ్ళతోన చూడమాకు
అంతకంటే మత్తునిస్తా గుండెమీద హత్తుకుంటా!

మల్లెపూల చెండు తోబాటు, పిండివంటకి శెనగపిండి
మర్చిపోక తెస్తివంటె మిర్చి బజ్జి చేసిపెడతా!
పెందలకాడె యింటికి చేరి తొందరగ్గ స్నానంచేస్తే
సందకాడ సరదా చేయ విందు భోజనమందిస్తా!

వెర్రి తలల కోరికతో కుర్ర చేష్టలు చేయమాకు
పక్క దారిన గడ్డికొరికి బక్క రోగం తెచ్చుకోకు
నీకు కట్టం-నాకూ కట్టం -బ్తుకు చీకటికొట్టం!
పయన మౌట కాష్టాలకే -ఎదురులేని పచ్చి నిజం!

20-9-2012

అందరానిది

అందరానిది ఎందుచూచిన
కానవచ్చునుజగతిని
చేతకానిది చేయబూనగ
బయలుదేరిరి భడవలంతా

చేయతగినదిచేయచాలక
గొర్రెదాటుడు చేయగలరు!

గొప్పకోసం అప్పుచేసియు
తప్పటడుగులు వేయగలరు!
దారి తప్పిన బాటసారిని
పోలియుందురు తెలివిమీరి!
తెలివితేటలు తెల్లవారగ
తెచ్చుకుందురు తిప్పలెన్నో

మమతలేని మనసునందున
ద్వేష మెంతో పెంచుకుందురు
ప్రగతికోసం అడుగువేసి
నడువలేరు సుంతయయిన

సోదరత్వఫు సొగసులేకను
మిడిసిపడుదురుపుడమియందున
ద్వేషభావపు బుద్డియందున
పెద్దలవుదఉరు త్రుంచివృయగ

వళ్ళువంగని సుఖములబ్బిన
మూర్ఖులంతా నేటిరాజులు
రాజకీయ బురదలోన
పొర్లుచున్న పందులండి!
>>>>>
కపిల రాంకుమార్

తగదు-తగదు

కపిల రాం కుమార్ . బి.వి.కె. ఖమ్మం// తగదు-తగదు

ఇంట్లో అల్లరి చేస్తున్నారని ఒంట్లో ఓపిక లేదంటూ
వంటింట్లో గిన్నెలనన్నీ నట్టింట్లోవిసిరారంటూ
వయసెదగని బాలలను జయిలు పాలుచేయద్దు

వ్యామోహపు చదువు పేర బడికి బందీ చేయద్దూ!

ఆడుతు పాడుతు గంతులు వేసే
పాల బుగ్గలను బడికి పంపే
క్రూరమయిన ఆలోచనలెందుకు?
బాల్యాన్ని తుంచటమెందుకు?

ఎంత విసిగిస్తే మాత్రం ఆంతకోపం ఎందుకు?
బరువును వదిలించగ చదువు శిక్షలెందుకు?
తాతగారి బామ్మగారి ముద్దుల మురిపాలకు
దూరంగ తోలటం ఘోరమయిన తప్పిదం!

తోటివారి చెలిమిలోని తీపిదనం అంద కుండ
చిన్న చితక తప్పటదుగుల అనుభవాలు పొందకుండ
ముద్దులతో, ముద్దలతో అమ్మే మొదటి గురువను
నానుడిని నిర్దయగ వమ్ముచేయచూడద్దు!

ఆయాల పాలు చేసి అమ్మదనపు పాల తీపి
అందకుండ చేయడం, ప్రక్రుతికే విరుద్దం
చిన్నతనపు చిత్రాలను పదిలపరకుండానే
బాల్యాన్ని చిదిమేటం - తగదు తగదు!

"

కపిల రాం కుమార్// జాతి గీతం//

జాతులన్నిట తెలుగు జాతి - దేశ భాషల తెలుగు తీపి
తెలుగు మాట తెలుగు పాట - తెలుగువాడా తెలుసుకోరా!

నన్నయార్యుని ఆదికవనం- నన్నె చోడుని జాను తెనుగు
సోమనాథుని వీరశైవం - తిక్కనార్యుని తేట తెలుగు

పోతనార్యుని తీపి పలుకు సార్వభౌముని దాక్షపాకం
కృష్ణరాయుని కొలువులోన కీర్తిగాంచిన కావ్య ప్రగతి

తెలుగుయెదలు జల్లుమనగ - ఎల్లదిశలు అల్లుకొనగ
ప్రబంధాల మలుపులోన స్పూర్తినొందె సరస జగతి!

దాక్షిణాత్యుల ప్రేమ తత్వం ముద్దుపళని ముద్దుపలుకు
రంగవల్లుల యక్షగానం జాలువారిన జాణ తెలుగు

అన్నమయ్య కీర్తనల్లో ఉరకలెత్తిన శ్రావ్య జగతి
త్యాగరాజుని భక్తి గీతం యెదలు పొంగిన పారవశ్యం!

వీరేశలింగం వివేకవర్థిని వెలుగుజూపిం బతుకు దీఫం
కర్మసాక్షిగా చురకలేసిన పానుగంటి వెలుగుబాట!

అప్పరాయని పిల్లపూర్ణిమ - సుబ్బరాయుని యెంకి ఊసు
విశ్వనాథుని కన్నెపాట పల్లె పడుచుల ఒంపుసొంపు

కృష్ణపక్షపు తెలుగు జిలుగు బడుగు జీవుల శ్రినివాసు
కష్టకాలపు రా.వి.కథలు కావ్యవైద్యుడారోరుద్రుడు!

తురగకవనపు దళిత సాహితి - సూతకథల త్రిపురనేని
ఎగురవేసిన తెలుగు తేజం మరువలేనివి తెలుసుకో!

పాలమీద తరకలాగ కరుణ పద్యాల బుద్ధగీతం
కావ్య ఋషుల తపోఫలాల అందుకోను కదలిరవోయ్!

18.9.2012

(నగరా కవితా సంపుటి 2004 నుండి

వాడు తేడా!

కపిల రాంకుమార్// వాడు తేడా!//

ఉదయాన్నే సూరీడు
మబ్బుల్లో దాగాడు
తలవంచిన వరిచే్లు
చేతులెత్తి పిలువ
తొలగిన మబ్బులోంచి
కిరణాలు చాచాడు !
ఆవిరైన జలరాశిని
ఆత్రంగా వంచాడు
చేను చెలక గంతేసి
ఆనందం పండించే!
***
సర్కారీ సూరీడు
మబ్బుల్లోనే ఉంటాడు
గుబులు పుట్టినప్పుడల్లా
రేట్లు పెంచుతాడు
ధరను పాలించమంటే
ధరలకు పాలిచ్చి
ప్రజలనుసికొలుపుతాడు!

వాడు తేడా
లేలెండి ఇక
తాడో పేడో
తేల్చడానికి!

14.09.2012
__________
**తాజా కవిత**

మధు -విద్యాలయం

కపిల రాం కుమార్// మధు -విద్యాలయం ( వైరా)//

మధురమైన  బడిలోన - విబుధులున్నచోటు
చవులూరె తేనెపట్టు - చదువులకే ఆటపట్టు!
సకల కళల రసపట్టు - అనుదినము వెన్నుదట్టు
గురుకులాల పద్ధతిలో ఫలితాలకు పెద్దపెట్టు!

గురువులను గౌరవించు - తరువులను పోషించు
సంప్రదాయ సాంకేతిక సంసర్గలు  సంగమించు!
చిరుమువ్వల సవ్వడిలో మనసుదోచి వీణమీటు
ప్రజాకళల ఉన్నతికి ప్రయోగాలున్నచోటు!

ఉద్యమాల స్పూర్తి తోన కాబోయే పౌరులకు
శిరోధార్య విధానాల కరదీపికలున్నచోటు!
ఉత్సవాల అతిథులకు ఉత్సాహపు వేడుకలు
కలకాలము నిలచిపోవు మరపురాని అనుభూతులు.!

13.9.2012
______________________________________
(** ఖమ్మం జిల్లా వైరా లోని ''మధు విద్యాలయం '' - పాఠశాల స్థాయి నుండి జూనియర్ కళాస్థాయికి ఎదిగింది - వారు గతంలో నిర్వహించిన ఒక వార్షికోత్సవంలో చదివిన కవిత)

ఎవరికీ పట్టదా?

కపిల రాంకుమార్// ఎవరికీ పట్టదా?

'' ఏం తినేటట్లు లేదు, యేం కొనేటట్టు లేదు ''
పాట విని బావుందని చప్పట్లు కొడతాం!
కాని.........
డీజిల్, పెట్రోల్ రేట్లు పెరుగుతున్నా,
విద్యుత్ కోత చాల్దన్నట్లు ధరల్ వాత పెడుతున్నా,
కిలో సరుకులు సగానికి తగ్గించినా
ఖర్చు రెట్టింపైనా, జేబు చిల్లు పడినా.
కూలిపెరిగి, కూటికి చాల్కపోయినా,
దోమ కాట్లకు జనం చస్తున్నా,
కాకుల తరిమి గద్దల్ని మేపుతున్నా,
ఎవరూ మట్లాడరేం???
పీక తెగకోస్తున్నా స్పర్శలేని మౌనమేమిటో???

ఎవరికి పుట్టిన బిడ్డో వెక్కి వెక్కి యేడ్చినట్లు
ధర్నాలు, రాస్తా రోకోలు ప్రతిపక్షాలకే పట్టిందా???
లాఠీలు, టియర్ గ్యాస్ల్ -కాల్పులు మామూలేనని వూరుకుత్టారేం???
చానళ్ళకు చేతినిండా పనేగానా?
ఏం - ఓట్లప్పుడు వొళ్ళు తెలవదా??
నోటుకు--నాతుకు--ముక్కకు పడి దొర్లటమేనా?
ఘాటుగా ఒక్క గట్టి గుద్దు గుడ్డె చేవలేనితనం!
పిరికితనం ఆవిరిస్తే
వెనకబాటుతనం ఎప్పుడు పోద్ది!
చేతులతో గుద్ది, చేతులు కాలిన తరువాత
యే ఆకులు పట్టుకుని యేం లాభం!!!
ఐదేళ్ళు ఆగాల్సిందేగా???
కత్తిలాంతిది చేతిలోవుంచుకొని
ఉపయోగించలేని ఓటరుని
ఆపుతున్నదేమిటి???

పైగా ప్రజలు చైతన్యవంతులంటారేం! ఏది ఆ చేతనైనతనం?
మొలబంటి లోతులో దిగబడ్డ బుద్ధి రాదా???
నిండ మునిగిన తరువాత చలేమి్ వుండకపోవచ్చు!
మునిగే వుంటే శ్వాసే ఆగుతుందికదా!
ఆమాత్రం యింగితం కూడలేదా!
తిరుగుబాటు ధ్యాస కలుగదా!
లేక
శ్వాసే ఆపుకుంటారా!
మైకం నుండి ప్రజలు కోలుకోవాలని
మేలుకొని, వారి మేలుకొరకు
చర్నాకోలా ఝళిపించాలని కోరుకుంటూ.........!!!!!????

12912

ఎదురుచూపు

కపిల రాం కుమార్ //ఎదురు చూపు//

చివురుకొమ్మల లేజివుళ్ళే - కోకిలమ్మకు పుట్టినిళ్ళు
లేగదూడల కాలె అందెలె పల్లె సీమకు ఆనవాళు!

కథలలోన కవితలోన అందమైన ఊహలోన
పల్లె చిత్రపు రంగులన్ని వెల్లి విరిసినరోజులేవి?

ఏవి తల్లీ నీళ్ళు నిండిన చెరువు కుంటలు
ఏవి తండ్రి పొంగి పొర్లిన పాడిపంటలు

వన్నె తప్పిన పంటకాల్వలు
చిన్న బోయిన చెరుకు తోటలు
కళలు తప్పిన జనపదం
నేటి పల్లెకు నిలువుటద్దం!

నిద్రలేచిన పల్లె గుర్తుకు ఆవలించే జాడలేవి?
ఇంటికోడలి చేతి గాజుల వెన్న చిలికే సవ్వడేది?

పాలనురగల పిడతలిడగ దాలిమండగ పిడకలేవీ
జడలుచుట్టిన గాదె నిండక కడుపు నింపే కూడుయేది?
అట్ల తద్దికి ఆట లేవి ?
చెట్టుకొమ్మన వూయలేది?
ఏరువాకకు పాటు లేవి?
గంగిరెద్దు గంతులేవి?

చిల్లుకుండలు వెక్కిరిస్తే విరిగిపోయిన మట్టిచక్రం!
వల్లకాటిలో కాలుతూ మూగవోయిన సాలెమగ్గం!
రాజకీయం రాకముందు ఏక చత్రపు గూండె ది్టవు
(నేటి) రంగురంగుల రాక్షసానికి చిద్రమైనది నిండుకొలువు!

సప్త పుత్రుల కధలు చెప్పి నిద్ర పుచ్చే తల్లి వేదన
తప్త హృదయపు వెతలు తొలగె స్వచ్చమైన బతుకు శోధన!
ఆత్మ హత్యల తోరణాలతో పర్వదినపు తర్పణాలను
పాటలోన రాయలేను శిరసునింక వంచలేను!

శాంతి శూన్యం జాతి దైన్యం రూపుమాపే రోజుకోసం !!
తిరుగుబాటు ఆదునుకోసం ఏదురు చూచె పల్లె వాసం!!!

11-9-2012.

పిచ్చి తల్లి

కపిల రాం కుమార్ //పిచ్చి తల్లి//

హోదాల్కు తగ్గట్టు పేదరాలు లేదని
ఇల్లాలి మోజులో తల్లినే మరిచావా!
ఎండిన రొమ్ముతో ఎముకలగూడని

పనికిరాని వస్తువులా కాల్దన్న చూస్తావా!

మంచులాంటి చల్లదనం మల్లెదనం
పొత్తిళ్ళవెచ్చదనం మరచుట మరిపాపం
బడినూండి వచ్చునపుడు బడలిక చెందావని
ఒక్కపూట పస్తులతో నీ పడుపు నింపినాది.

తోటివారి దెప్పులకు బిక్కమొగమేసినపుడు
చొక్కలాగు కొనటానికి రొక్కమేమి లేకపోతే
మారాము చేసి నీవు మట్టికుండ పగులకొట్ట
మారుమాటచెప్పకుండ సూత్రాల్ను ఆమ్మినాది!

చిన్నపుడే నాన్నలేడని నీకేమి లోటు తేక
గుట్టుగాపెంచినట్టి గురువులాంటి తల్లిరా!
నీ చదువు ఈ తిండి యీ ఇల్లు నీ హోదా
రక్తాన్ని ఖర్చుపెట్టినీ మీదే ఆశపడే!

కొడుకు మీద ప్రేమతో చీరి రోజు కోసము
నిప్పుపెట్టు చేతులకై అర్థించగ వచ్చినాది!
నీ ముంగిట వాలిందని చులకనగా చూడబోకు
ముగ్గుబుట్ట నేడో రేపో రాలిపోవు రామ చిలుక!

మొదటి ముద్ద గోటితో పేరుపేరునందించి
మాట నేర్పిన మహిళకు మంచినీరు పోయవేమి?
మనిషివైతే కదిలారా! మనసు తలుపు తెరువ రారా!
నీ ధర్మం నెరవేర్చగ ఆదరమూ చూప రావా??

10-9-2012

/పుస్తక మస్తిష్క వేదన//

కపిల రాంకుమార్//పుస్తక మస్తిష్క వేదన//

ఊసులేవో చెప్పటానికి మనసు నీతో విప్పటానికి
చేరవచ్చే మంచి నేస్తం -చెలిమి కోరే పుస్తకం!

నాటి కతలు చెప్పగానునేటి వెతలు తీర్చగానూ
మేటి రేపటి బాటనీకు తేట తెల్లం చేయగానూ

కష్టసుఖములు పూలతోటలుప్రేమ ద్వేషపు పోటకత్తులు
గెలుపు ఓటమి బొమ్మ బొరుసులు పుస్త్కాలే పూలగుత్తులై

బతుకు సంద్రపు ఆటుపోటులు ్చెల్ల చెల్లచెదదు చేయవచ్చును
గతుకు దారుల అలుపు సొలుపు సేదతీర్చి బలము నిచ్చును!

ఎల్లకాలం వుండనీకి కల్ల బతుకు తొలగటానికి
వాటి చెలిమి ఎంతో బలిమి పరులు దోచని జ్నాన కలిమి

పుస్తకాల పురుగులంటే పాడుచేసే చెదలు కావు
బూజుపట్టిన యెదలు తుడిచి ఎదుగనిచ్చే మంచియెరువు!

మంచిమాటలు చెప్పవస్తె చెవులకింపుగ సోకబోద?
జ్ణానసంపద పంచవస్తే అందుకోను కదలిరావా!

కోకిలమ్మల పాటలెన్నో పైరగాలికి కదులుతున్నాయ్
దేవదూతల నాట్య కేళి కనుల ముంగిట మెదులుతున్నయ్!

రాక్షస రాజ్యపు కథలెన్నో రహస్య చేదన శాస్త్రాలెన్నో
విశాల్ లోకపు గుప్త నిధులు తమలో మనకై దాచుకున్నాయ్!

జ్నాన లోకపు మర్మమేదో పొందటానికి కదలిరావా?
చెప్పటానికి చెంతకొచ్చిన పుస్తకాల్ మాట వినవా?

9-9-2012
______________________________________________________
( ప్రజా కవి- ప్రజా కళాకారుడు కీ.శే. సఫ్దర్ హష్మీ రాసిం హిందీకవిత """ కితాబే కుచ్ కహనా చాహితీ హై""" కి తెలుగు అనుసరణ - నా నగారా కవిత సంపుటి నుండి)

అమ్మపాట

కపిల రాంకుమార్// అమ్మపాట//

ఊయలూపు అమ్మపాట - అనుకరించు మొదటి మాట
అనుభవాల గోరుముద్ద - నడిపించే వెలుగుబాట!

బాల్యంలో తప్పటడుగులెదుగుటకై ప్రాకులాట
ప్రాయంపుటంచుల్లో అపాయాలఊగులాట!

ఓనమాలు దిద్దుటలో - పిచ్చిగీతలందమూ
గురువునేర్పు నీతులే - మనుగడకనుబంధమూ!

అనుకరించు క్రమములో - అప శృతులు రానీకు
అనుభవాల గుణపాఠం అనుదినము మరువకు!

కులమంటూ,మతమంటూ - చెడువూహలు రానీకు
కలలంటూ - కథలంటూ కల్పనలో కదలాడకు!

మోసాలకు ద్వేషాలకు బలిచేయకు మానవత
ఎదిరంచే మదివుంటే - తొలి విజయం నీదంట!

తరతరాల సంస్కృతిని కాపాడుత నీ ధర్మం!
స్వార్థ పరుల ఆటకట్టనుద్యమించు అనునిత్యం