రంగులు మారుతున్న స్వరాజ్యం

కపిల రాంకుమార్ || రంగులు మారుతున్న స్వరాజ్యం||

అరవైఆరేళ్ళ స్వరాజ్యానికీ
ఆరళ్ళు తప్పటంలేదు
' కాగ్ ' అక్షితల సాక్షిగా!
పైగా పాలకులు చీలికలు
పెట్టడమూ మానలేదు!
**
వయోజనుల ఓటెందుకో
ప్రతీసారీ ఓటిపోతోంది!
ప్రణాళికా సాళ్ళ వంకర టింకరలవల్ల
ప్రతీ సారీ వట్టిపోయిన పాడిపంటలయినట్టు
రెడ్డొచ్చి మొదలాడే ఆటలా
అంచనాల వ్యయం పెరగటమే తప్ప
ఫలితాలు ప్రజలకందేలోగా
ప్రజల ప్రతినిధులు ప్రతీ నిధిలో వేలు పెట్తుంటే
రూపు మార్చుకొని , రూటు  మార్చుకుంటున్నాయి!
**
అందుకే ప్రతీ ' అర ' క్షణమూ
ప్రతీ చోట ' అ-రక్షణమే!
రావణకాష్టంలా సమస్యలు
అనుకోని విధ్వంసాల పాలవుతుంటే
సార్వభౌమత్వపు ఉబికికే
సవాలు విసిరేలా అంతర్గత శత్రువులు
కకావికలం చేయబోతుంటే
అందుకే - మౌనం వహించటం కవులవంతు కాదు!
ప్రజల చైతన్యంకై భేరి మోగించకా తప్పదు!
పంద్రాగష్టు రంగులు మారకుండా
సుస్థిరమైన దీక్ష పట్టక తప్పదు!

_______________
14..8..2013