ఈ విధ్వంసం ధ్వంసం కావాలి

 ఈ విధ్వంసం ధ్వంసం కావాలి!

శ్మశాన వైరాగ్యం పొంది

బౌద్ధం స్వికరించే

చక్రవర్తుల కాలంకాదు

రక్తదాహం తలకెక్కిన

ఉన్మాదుల కాలం ఇది

అన్నార్తుల ఆక్రందనలతో

రుధిరధారల ప్రవాహంలో

ఆనందంగా గంతులేసే

ఛాందసమతవాదుల,

సామ్రాజ్య వాదుల

కరాళనృత్యంలా

పేట్రేగిపోతూండే కాలమిది

పడమటి ముసాంబరంలా

నిత్యం రావణకాష్టంలా

ప్రపంచం ఓలలాడాలనే కండూతి వారిది

ఇక ఇప్పుడు 

ఆ తలకెక్కిన ఆ అకృత్యపు దాష్టీకం

సమూలంగా నశించాలనే ఘోష 

నలు దిక్కులా మార్మోగాలి

వారి కర్ణభేరులు పగిలి

మూసుకుపోయిన నేత్రాలు తెరవబడేలా

శాంతి హోరు ఝంఝా మా‌రుతమవ్వాలి

సౌహార్ద్ర భరోసా అందేలా

శాంతి కాముకులు నడుము బిగించాలి.