|| చింత పడమాకు పటేల ||

కపిల రాంకుమార్ || చింత పడమాకు పటేల ||

పటెల్ గిరి పోయిందని - చింతపడమాకు
పుట్టికతో పొటీలీవు - చెంతనేనున్నాను

పదిమందికి బువ్వెట్టే
సిరికలిగేవున్నావు
కడగండ్లు తీర్చనీకి
కండకలిగేయున్నావు!

ఆలమంద నమ్ముకుంటె
అరలచ్చవస్తాది - మా
ఆడమంద గుండెల్లో
పెద్దపీటయేస్తాది!

యెన్నిసార్లు యెన్నెల్లో
వాగులెంట తిరిగాము
సిననాటి సెలికాడ
నేనుండ దిగులేల?

బుర్రమీసమొడిసిపట్టి
కిర్రుసెప్పులేసుకోని
రచ్చబండమీద
(మా)రాజులాగుంటావు!

గుండెలోన గుబులుంటె
గాదెలెట్ల నిండేను?
ఆండగా నేనుండ
గండాలు దాటుదాము!

ఊరువాడ నువ్వంటే ఉరికొస్తాది
ఏరువాక సాగనీకి కదిలొస్తాది!
కడుపు పండలేదాని కలవరమంద్కు
కడుపు నింప కూలోల్లకి కన్నతండ్రినీవె!

కొలువుకన్న పరువు మిన్న
కలతలేక బతుకేందుకు
పసుపుతాడు కట్టవోయి
కట్టుకున్న ఆలినౌత!

గువ్వలమై దండలోని పువ్వులమై
ఒద్దికగ యిరువరము సాగిద్దామిక కాపురము!

(అమలిన శృంగారాని అద్దంపట్టే గీతం)
15.2.2013 ....రాత్రి 7.35 .....